【現今社會 有良心嘅老闆好少有亦好難求 無人天生識做爸爸 男士待產假唔係可有可無】

早幾日睇新聞，見到張生話「侍產假一日都不應該有」。

其實，佢講中左幾多老闆心中嗰句？

係，係好難聽，但我諗，成個香港，唔只佢一個咁諗，大把人咁諗！

就正如成日有上一代人會話新一代唔捱得，新不如舊...

根本，只係得張生有勇氣講出口！

一個有良心既老闆，根本唔會只係睇法例最低要求！

香港宜家法例規定只有3日男士待產假，有幾多老闆係真係只俾3日？

老公既公司比較好少少，有5日，連埋星期六、日，一共有9日假期~

蠔豉妹妹之前因爲唔舒服，入左3日醫院，佢公司都無扣佢大假，佢老闆話小朋友健康最緊要，照出糧。

(當然，都會打黎問下之前未完成既project進度)

一個老闆，好同唔好，係呢啲細位到就比較到~

你以為只有女人要坐月？

男人天生識做人阿爸？唔需要時間適應？

3日，好彩加埋星期六、日，一共有5日~

你要求神拜佛BB無病無痛，唔好黃，如果唔係日日要去健康院、醫院覆診~

你要求神拜佛BB返到屋企，第一晚就唔洗食夜奶，一陣每2個鐘醒一次，都唔知俾媽媽訓好定點~

你要求神拜佛，媽媽係一個超人，你返緊工時，媽媽可以又餵奶、又換片、又氹BB、又夠休息可以坐到月~

以前，成日都講以前。

以前你俾人蝦，宜家又要蝦返人係一個咩觀念？

老師教以德報怨，你就諗住keep住怨落去？

將心比心，你唔俾個爸爸放待產假，一個有責任心既爸爸，個心咪又係掛住BB同老婆~

個人返左工，個心飄走左，有用咩？

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Pig Wing

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： mami@presslogic.com，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！